سابق وزیراعظم میاں نواز شریف اور آصف زرداری کی دبئی میں ہونے والی ملاقاتوں کے حوالے سے نواز شریف نے مولانا فضل الرحمان کو اعتماد میں لے لیا۔
اس حوالے سے ذرائع کا کہنا ہے کہ نواز شریف نے مولانا فضل الرحمان کے تحفظات دور کر دئیے ہیں، دونوں رہنماؤں کے درمیان ویڈیو لنک پر ہونے والی گفتگو میں نواز شریف نے مولانا فضل الرحمان کو اعتماد میں لیا۔
ذرائع کے مطابق دوران گفتگو دونوں شخصیات نے اتفاق رائے سے معاملات آگے بڑھانے پر اتفاق، کیا۔
یاد رہے کہ مولانا فضل الرحمان نے پیپلز پارٹی اور ن لیگ کے درمیان ہونے والے فیصلوں پر انہیں اعتماد میں نہ لینے کا شکوہ کیا تھا۔
ذرائع کا کہنا ہے کہ میاں نواز شریف اور آصف علی زرداری معینہ مدت پر اسمبلیاں تحلیل کرکے نگران حکومتوں کے قیام اور قومی انتخابات کے حامی ہیں لیکن مولانا فضل الرحمان اس کے خلاف سخت موقف رکھتے ہیں، اسی لئے انہیں دبئی مذاکرات اور ملاقاتوں کے عمل میں شامل نہیں کیا گیا اس لئے وہ ناراض ہوئے تھے۔
