کراچی: پاکستان انٹرنیشنل ایئر لائن (پی آئی اے) کے ملازمین کی تنخواہوں میں 30 فی صد اضافے کی تجویز دی گئی ہے۔
تفصیلات کے مطابق پی آئی اے کا اہم ترین اعلیٰ سطح کا اجلاس آج لاہور میں طلب کر لیا گیا ہے، جس میں شرکت کے لیے سی ای او پی آئی اے، چیئرمین، سیکریٹری ہوابازی سمیت اعلیٰ افسران لاہور پہنچ گئے ہیں۔
ذرائع کا کہنا ہے کہ پی آئی اے ملازمین کی تنخواہوں میں 30 فی صد تک اضافے کی تجویز ہے، اس سلسلے میں پی آئی اے انتظامیہ نے سفارش تیار کر لی ہے، پی آئی اے انتظامیہ نے تنظیم نو کے پلان پر بھی کام شروع کر دیا ہے۔
انتظامیہ قومی ایئر لائن کی تنظیم نو سے متعلق بورڈ ارکان کو آگاہی دے گی، پی آئی اے کو مالی مشکلات، یورپ، امریکا کے لیے پروازوں کے معاملے پر بھی اجلاس میں غور ہوگا۔
ذرائع کا کہنا ہے کہ پی آئی اے کے جہازوں میں ان فلائٹ انٹرٹیمنٹ منصوبے پر بھی تفصیل اجلاس میں شیئر کی جائے گی۔
