زیبا بختیار ان اداکارائوں میں سے ہیں جنھوں نے پاکستان کے ساتھ بھارتی فلمی صںعت میں بھی اپنی اداکاری کے جوہر دکھائے ہیں، اب انھوں نے اپنی دوسری شادی پر برملا اظہار خیال کیا ہے۔
ماضی میں اپنی خوبصورتی کی وجہ سے مشہور اداکارہ نے اس بات کا اعتراف کیا کہ بھارتی شہریت حاصل کرنے والے گلوکار عدنان سمیع سے انھوں نے دوسری شادی کی تھی، ان کی پہلی شادی محض 19 سال کی عمر میں ہوگئی تھی۔
ذاتی زندگی پر کھل کر بات کرتے ہوئے انھوں نے بتایا کہ شادیوں سمیت گوگل پر موجود ان کی دیگر ذاتی معلومات جھوٹی اور غلط ہیں، سرچ انجن میں ان کی عمر 60 سال ظاہر ہوتی ہے لیکن وہ 57 سال کی ہیں۔
کم عمری میں طلاق، عدالتی معاملات نے انھیں ڈپریشن کا شکار کردیا تھا جس کے لیے انھوں نے دوائیں بھی لیں، اب وہ اپنی جسمانی فٹنس کا خیال رکھنے کے لیے ورزش کرتی ہیں۔
زیبا بختیار نے انکشاف کیا کہ 19 برس کی عمر میں شادی کے وقت وہ شوبز میں نہیں تھیں، پہلی شادی ایک سال بعد طلاق پر ختم ہوئی، شوبز میں آنے کے بعد دوسری شادی گلوکار عدنان سمیع خان سے کی۔
دوسری شادی اور طلاق کے بعد 18 ماہ تک وہ بیٹے کی حوالگی کے لے مقدمہ لڑتی رہیں، انھوں نے بتایا کہ اذان سمیع کو سابق شوہر سے نفرت نہیں سکھائی کیوں کہ وہ میرے بیٹے کے باپ ہیں۔
اگرچہ زیبا بختیار نے اعتراف کیا کہ ان کی دونوں شادیاں زیادہ عرصہ نہیں چل سکیں اور انہیں طلاق لینا پڑیں، تاہم انہوں نے شادیوں کے ختم ہونے کی وجوہات نہیں بتائیں اور نہ ہی انہوں نے اپنے پہلے شوہر سے متعلق کوئی وضاحت کی۔
عدنان سمیع خان اور زیبا بختیار نے 1990 کی دہائی میں شادی کی تھی، دونوں نے اس وقت شادی کی تھی جب زیبا بختیار کا کیریئر عروج پر تھا، تاہم ان کی شادی بھی جلد ہی طلاق پر ختم ہوئی۔
شادی کے کچھ ہی عرصے بعد ان میں طلاق ہوگئی، جس کے بعد دونوں کے درمیان بچے کی کفالت کا طویل مقدمہ عدالتوں میں چلتا رہا اور 18 ماہ کی عدالتی جنگ کے بعد ماں نے بیٹی کی کفالت کا کیس جیتا۔
