حیدرآباد : وزیراعلیٰ سندھ مراد علی شاہ کا کہنا ہے کہ 13 اگست تک سندھ اسمبلی فعال رہے گی، مدت مکمل ہوتےہی اسمبلی تحلیل کردی جائے گی۔
تفصیلات کے مطابق وزیراعلیٰ سندھ مرادعلی شاہ نے میڈیا سے گفتگو کرتے ہوئے کہا کہ نگران وزیر اعلیٰ کیلئےمشاورت جاری ہے، 13 اگست تک سندھ اسمبلی فعال رہے گی، مدت مکمل ہوتےہی اسمبلی تحلیل کردی جائے گی۔
مراد علی شاہ کا کہنا تھا کہ بجلی کی غیر اعلانیہ بندش پر وزیراعظم سےبات ہوئی۔
خیال رہے پیپلزپارٹی نے اسمبلی کی قبل از وقت تحلیل کی تجویز کی مخالفت کی تھی ، ذرائع نے بتایا تھا کہ پیپلزپارٹی چاہتی ہے اسمبلی مدت پوری کرنے کے بعد مقررہ تاریخ کو ہی تحلیل کی جائے۔
جیالی قیادت کا موقف تھا کہ بارہ اگست سے پہلے اسمبلی توڑنےسے مہم کیلئے تیس اضافی دن ملنے کے علاوہ کوئی فائدہ نہیں ہوگا اور قبل ازوقت تحلیل جمہوریت پسندوں کیلئے منفی پیغام ہوگا۔
