وزیر خارجہ بلاول بھٹو نے کہا ہے کہ افغانستان سے مطالبہ کیا کہ انہیں دہشت گردی کو روکنا چاہیے اگر افغان حکام کارروائی نہیں کرتے تو افغانستان کے اندر کارروائی پر غور ہو سکتا ہے۔
اسلام آباد میں وزارت خارجہ میں وزیر خارجہ کے "تبدیلی اقدام” کے تناظر میں تقریب سے خطاب کرتے ہوئے وزیر خارجہ نے کہا کہ پاکستان دہشت گردی کے مقابلے کیلئے افغانستان کی مدد کیلئےتیار ہے، افغانستان سے مطالبہ کیا ہے کہ انہیں اپنی سرزمین دہشت گردی کو روکنا چاہیے۔
انہوں نے کہا کہ افغانستان سے دہشت گرد سرگرمیوں کے تناظر میں اپنے دفاع کیلئے عالمی قانون پر عمل کریں گے، افغان حکام کارروائی نہیں کرتے تو افغانستان کے اندر کارروائی پر غور ہوسکتا ہے، بہرحال افغانستان کے اندر ایکشن ہمارا پہلا آپشن نہیں ہوگا۔
وزیر خارجہ نے کہا کہ دہشت گردی کے بارے میں ہماری پالیسی واضح ہے، ہم بلاکس کی سیاست میں نہیں ہیں، نیٹو نے جو اسلحہ اور سپلائز چھوڑی ہیں وہ بعض جگہیں دہشت گردوں کے پاس ہے۔
اپنے خطاب میں بلاول بھٹو کا کہنا تھا کہ بطور وزیر خارجہ یہ میرا منشور تھا کہ اس وزارت کو بہتر بنایا جائے، ہمیشہ کوشش رہی کہ بیرون ملک مشنز، دفتر خارجہ میں بہترین رابطہ قائم کیا جائے اور ایسا پلیٹ فارم ہو جو عام لوگوں کیلئے باآسانی قابل رسائی ہو۔
انہوں نے کہا کہ موسمیاتی تبدیلی کے تناظر میں وزارت خارجہ میں شمسی توانائی سے فائدہ اٹھانے کا فیصلہ کیا گیا ہے، وزارت خارجہ کیلئے شمسی توانائی منصوبے کو یقینی بنانے میں چین کے مشکور ہیں۔ وزارت خارجہ کی نئی ویب سائٹ بھی تیار کی، ہمارا خیال ہے وزارت خارجہ میں معنی خیز تبدیلیوں کی ضرورت ہے۔
