لاہور : وزیراعظم کے مشیر اور پیپلزپارٹی کے سینئر رہنما قمر زمان کائرہ کا کہنا ہے کہ مردم شماری کی وجہ سے کسی صورت الیکشن ملتوی نہیں ہوسکتے۔
تفصیلات کے مطابق وزیراعظم کے مشیر اور پیپلزپارٹی کےسینئررہنما قمر زمان کائرہ نے اے آر وائی نیوز کو خصوصی انٹرویو دیتے ہوئے کہا کہ اسمبلیاں مدت پوری کررہی ہیں اور التوا کا کوئی راستہ نہیں ،مجھےکیوں یقین نہ ہو کہ الیکشن مقررہ وقت پر ہوں گے۔
قمرزمان کائرہ کا کہنا تھا کہ مردم شماری پر ایم کیوایم کواعتراض ہے اورانتخابات بھی اسی کےتحت چاہتےہیں، اگر ان کے مطالبات مان لیےجائیں تو ایک سال تک الیکشن ہی نہ ہوں یہ ناممکن ہے، مردم شماری کی وجہ سے کسی صورت الیکشن ملتوی نہیں ہوسکتے۔
وزیراعظم کے مشیر نے کہا کہ 4 ماہ سے اتنی بحث ہوئی کہ اسمبلیوں کی مدت میں توسیع ہوگی تو ہم کہہ رہے تھے نہیں ہو گی، اب نگران سیٹ اپ کی توسیع کی بات پربھی ہم کہتے ہیں ایسا نہیں ہوگا۔
