کراچی میں خواتین کے ساتھ ہونے والے پے درپے جنسی ہراسگی کے واقعات پر رد عمل دیتے ہوئے اپوزیشن لیڈرسندھ اسمبلی رعناانصار کا کہنا تھا کہ خواتین کا گھروں سے باہر نکلنا مشکل ہوگیا ہے۔
اے آر وائی نیوز سے خصوصی بات کرتے ہوئے انہوں نے کہا کہ ایسا لگتا ہے خواتین جیسے ہی گھروں سے باہر نکلیں گی شکار کیلئے لوگ موجود ہوتے ہیں۔
اپوزیشن لیڈرسندھ اسمبلی نے کہا کہ ماحول کس طرف جا رہا ہے ہم کس سے بات کریں؟ انتظامیہ کی جانب سے بھی حفاظتی انتظامات نہیں کیے جارہے، پولیس انتظار کس چیز کا کر رہی ہے، واقعات کی سی سی ٹی وی فوٹیج موجود ہے۔
واضح رہے کہ گزشتہ روز سمن آباد میں خاتون کوہراساں کرنے میں ملوث شخص کی پولیس کو اب تک تلاش ہے جب کہ ایک ماہ گزرنے کے باوجود گلستان جوہر میں خاتون سے نازیبا حرکت کرنے والا ملزم قانون کی گرفت میں نہیں آسکا ہے۔
وزیر اعلیٰ کے نوٹس لینے کے بعد گلشن پولیس نے 3 مشکوک افراد کو حراست میں لیا تھا تاہم انھیں تفتیش کے بعد چھوڑ دیا گیا۔
واضح رہے کہ18 جولائی کو اورنگی ٹائون کے علاقے میں بھی ایک خاتون کو ہراساں کرنے والے ملزم کو ڈسٹرکٹ ویسٹ پولیس کی جانب سے گرفتار کیا گیا تھا۔
