لاہور: پولیس نے ورلڈ اسنوکر چیمپئن احسن رمضان کو رات گئے اسنوکر کھیلتے ہوئے گرفتار کر لیا۔
تفصیلات کے مطابق لاہور میں گرین ٹاؤن پولیس نے اسنوکر کلب تاخیر سے کھلا رکھنے پر چھاپا مارا اور عالمی چیمپئن احسن رمضان کو گرفتار کر کے تھانے لے گئی۔
احسن رمضان کی حوالات کے باہر کھڑے اور بیلٹ اترے ہوئے تصاویر منظر عام پر آ گئیں، پولیس نے اسنوکر ورلڈ چیمپئن احسن رمضان کو 15 منٹ تک حوالات میں بند رکھا۔
احسن رمضان نے بتایا کہ پولیس اہلکار گالیاں دیتے رہے اور بیلٹ اتروا کر حوالات میں بند کر دیا، میں نے پولیس اہلکاروں کو بتایا کہ میں ورلڈ چیمپئن ہوں، تو پولیس اہلکاروں نے کہا ہم پر احسان کیا ہے اور گالیاں دیں۔
انھوں نے بتایا کہ جب ان کے ایک دوست تھانے آئے تو 15 سے 20 منٹ بعد انھیں رہائی ملی، احسن رمضان نے وزیر اعظم اور نگران وزیر اعلیٰ سے پولیس اہل کاروں کے خلاف کارروائی کا مطالبہ کر دیا ہے۔
