کیلیفورنیا : امریکا میں دوران پرواز دو ہیلی کاپٹروں کو حادثہ پیش آیا جس کے بعد خوفناک آگ بھڑک اُٹھی جس کے نتیجے میں تین افراد ہلاک ہوگئے۔
امریکی ریاست کیلیفورنیا میں فلاحی ادارے کے دو ہیلی کاپٹر دوران پرواز پائلٹ سے بے قابو ہوکر آپس میں ٹکرا گئے، حادثے کے بعد ہیلی کاپٹروں میں آگ لگ گئی۔
آگ اس قدر شدید تھی کہ ایک ہیلی کاپٹر میں موجود افراد کو بچنے کیلئے کوئی اقدام اٹھانے کا موقع نہ مل سکا اور جائے وقوعہ پر جل کر جان سے گئے۔
غیر ملکی خبر رساں ادارے کی رپورٹ کے مطابق دونوں ہیلی کاپٹرز ریسکیو ادارے کی ملکیت تھے اور آگ بجھانے کے لیے استعمال ہوتے تھے،حادثے کے وقت بھی دونوں ہیلی کاپٹرز جنوبی کیلیفورنیا کے علاقے کیبازون میں لگی آگ بجھانے کی ڈیوٹی پر مامور تھے۔
رپورٹ کے مطابق ایک ہیلی گر کر تباہ ہوگیا، اور اس میں سوار تینوں افراد ہلاک ہوگئے جبکہ دوسرے ہیلی کاپٹر کا پائلٹ اسے بحفاظت زمین پر اتارنے میں کامیاب رہا۔
مذکورہ ہیلی کاپٹر حادثے میں ہلاک ہونے والوں میں پائلٹ کے ساتھ ایک کیپٹن اور فائر فائٹنگ ڈپارٹمنٹ کے ڈویژن چیف شامل ہیں۔
