امیر جماعت اسلامی نے کہا ہے کہ اتحادی حکومت نے کم ترین مدت میں بدترین گورننس کا ریکارڈ توڑ دیا، وزیراعظم اور کابینہ عوام کو تکلیفیں دینے پر معافی مانگیں۔

اے آر وائی نیوز کے مطابق سراج الحق نے اپنے بیان میں پی ڈی ایم حکومت کو تنقید کا نشانہ بناتے ہوئے کہا کہ اتحادی حکومت نے کم ترین مدت میں بدترین گورننس کا ریکارڈ توڑ دیا ہے، عوام کو جو تکلیفیں دی گئیں اس پر وزیراعظم اور کابینہ معافی مانگیں۔

امیرجماعت اسلامی کا کہنا تھا کہ حکمرانوں نے 16 ماہ میں قرضے لیے، اپنے کیسز معاف کرائے، حکمران جماعتوں میں امریکی وفاداری اختیار کرنے کا مقابلہ ہے۔

انھوں نے کہا کہ حکمران ائیرپورٹس، اسٹیل ملز، موٹرویز کے سودے کر رہے ہیں، حکمرانوں کا بس چلے تو پورا ملک بیچ دیں،انہیں بس اقتدار چاہیے۔

سراج الحق نے کہا کہ پی ڈی ایم، پیپلزپارٹی نے غریبوں کو بجلی کے جھٹکے دیے، پٹرول بم گرائے، ہر پاکستانی کا فرض ہے کہ فرسودہ نظام کے خلاف جدوجہد کرے۔