لاہور:قومی اسمبلی کی تحلیل اور سیاسی صورتحال پر استحکام پاکستان پارٹی کے صدر عبدالعلیم خان کا ردعمل سامنے آیا ہے۔
تفصیلات کے مطابق استحکام پاکستان پارٹی کے صدر عبدالعلیم خان نے کہا 5 سال جھوٹے سال جھوٹے وعدوں اور طفل تسلیوں پرگزر گئے، 2 حکومتیں کچھ نہیں کر سکیں، عوام بے بس رہے، ماننا ہوگا کہ لوگوں کے حالات میں رتی برابر بہتری نہیں آ سکی۔
صدر آئی پی پی نے کہا کہ بد قسمتی سے یہ اسمبلی عوامی توقعات پر پورا نہیں اتر سکی، ووٹرز کا اعتماد بحال کرنا ہوگا، مہنگائی بے قابو عام آدمی پس کر رہ گیا، مسائل میں مزید اضافہ ہوا، افسوس کہ ساڑے 3 سال نام نہاد تبدیلی اور ڈیڑھ سال دعوؤں کی نذر ہوگئے۔
عبدالعلیم خان کا کہنا تھا کہ اشیا ضروریہ، بجلی کے بل و پیٹرول کی قیمتیں لوگوں کی پہنچ سے باہر ہوچکی ہیں، وزرا اور ارکان بھی اس جانے والی اسمبلی سے ہرگز مطمئن نظر نہیں آئے، آبادی میں اضافہ اور وسائل میں کمی ہوئی، خرابی کی ذمہ داری سب کو لینا ہوگی۔
عبدالعلیم خان کا مزید کہنا تھا کہ یوتھ قیمتی اثاثہ ہے، اُن کو سوالوں کے جواب نہ ملے تو ملک آگے نہیں چل سکے گا، صرف الیکشن مسائل کا حل نہیں، انتخابی عمل کو شفاف اور قابل قبول بنانا ہوگا، اقوام عالم میں پاکستان کا وقار بلند کرنا بڑا چیلنج، درست پالیسیاں بنانا ہونگی۔
