کراچی: گورنر سندھ کامران ٹیسوری نے وزیر اعلیٰ مراد علی شاہ کی ایڈوائس پر صوبائی اسمبلی تحلیل کردی۔
اے آر وائی نیوز کے مطابق وزیر اعلیٰ سندھ مراد علی شاہ نے گورنر کامران ٹیسوری کو اسمبلی تحلیل کرنے کی سمری دی تھی جس پر انہوں نے دستخط کردیے جس کے بعد صوبائی اسمبلی تحلیل ہوگئی۔
سندھ اسمبلی تحلیل ہوتے ہی صوبائی کابینہ بھی ازخود تحلیل ہوگئی ہے جبکہ محکمہ قانون سندھ نے اسمبلی تحلیل ہونے کا نوٹیفکیشن بھی جاری کردیا ہے۔
واضح رہے کہ نگراں وزیر اعلیٰ کے تقرر تک مراد علی شاہ وزیر اعلیٰ سندھ رہیں گے۔
سندھ اسمبلی چار سال 11 ماہ اور 29 دن قائم رہی۔
مدت مکمل ہونے سے قبل اسمبلی ٹوٹنے پر 3 دن میں وزیراعلیٰ سندھ مراد علی شاہ اور اپوزیشن لیڈر نے نگران وزیراعلیٰ کیلئے مشاورت کرنی ہے۔
آج سندھ اسمبلی کا الوداعی اجلاس ہوا جس کی صدارت اسپیکر آغا سراج درانی نے کی جبکہ حکومتی اور اپوزیشن ارکان نے بھی اجلاس سے خطاب کیا۔
یاد رہے کہ قومی اسمبلی 9 اگست کو توڑ دی گئی تھی جس کے بعد اب نگران وزیراعظم کیلئے مشاورت کی جا رہی ہے۔
