اسلام آباد: پی ٹی آئی رہنما عمر ایوب نے کہا ہے کہ دیکھنا یہ ہے کہ نگراں وزیر اعظم انوارالحق کاکڑ آئین و قانون پر کتنا عمل کرتے ہیں، بروقت شفاف انتخابات نہ کرائے گئے تو ہم رد عمل دیں گے۔
تفصیلات کے مطابق پاکستان تحریک انصاف کے سیکریٹری جنرل عمر ایوب نے اے آر وائی نیوز کے پروگرام اعتراض ہے میں گفتگو کرتے ہوئے کہا ’’ہم دیکھیں گے انوارالحق کاکڑ آئین و قانون پر کتنا عمل کرتے ہیں، توقع ہے ان کی قیادت میں نگراں حکومت بروقت شفاف الیکشن کرائے گی، تاخیر ہوئی تو پھر ہمارا رد عمل آئے گا۔‘‘
انھوں نے کہا پنجاب اور خیبر پختون خوا میں نگراں حکومتیں غیر آئینی طور پر موجود تھیں، کے پی سے نگراں کابینہ کو ہٹا دیا گیا ہے جو خوش آئند ہے، امید ہے پنجاب کی نگراں حکومت کے خلاف بھی کارروائی کی جائے گی، صوبائی نگراں حکومتیں کس کے اشارے پر چل رہی تھیں سب کو معلوم ہے۔
عمر ایوب نے کہا پارٹی چھوڑنے والوں کو احتیاط سے بنیاد رکھنے والی بات کرنی چاہیے، پرویز خٹک ہمارے ساتھی رہے ہیں، ان کو احتیاط کرنی چاہیے، بے بنیاد باتیں نہ کریں، پاکستان تحریک انصاف کی مقبولیت سروے کرا کر دیکھ سکتے ہیں۔
انھوں نے مزید کہا مخالفین بے شک فولاد کی دیواریں بنا دیں، ہمارے لیے راستے ضرور نکلیں گے، پارٹی میں بہت لوگ آتے ہیں اور بہت لوگ جاتے ہیں، جو لوگ پارٹی چھوڑ کر گئے ہیں پاکستان تحریک انصاف کو فرق نہیں پڑتا، پشاور میں حالیہ بلدیاتی ضمنی انتخاب کے نتائج سب کے سامنے ہیں، پی ٹی آئی سے متعلق عوام کی بالکل واضح رائے سامنے آ رہی ہے۔
عمر ایوب کا کہنا تھا کہ ’’ہم چاہتے ہیں پری پول دھاندلی نہ ہو، الیکشن کمیشن کا کردار منفی رہا ہے، الیکشن کمیشن پنجاب اور کے پی میں مقررہ وقت پر الیکشن کا ذمہ دار تھا لیکن اس نے جانب داری کا مظاہرہ کر کے غیر آئینی کا کام کیا۔
