لاہور: 14ا گست کو جشن آزادی کی خوشی میں ہوائی فائرنگ کرنے والے 6 ملزمان کو پولیس نے گرفتار کرلیا، ملزمان کی جانب سے شاہدرہ، بادامی باغ میں کی گئی فائرنگ سے 2 بچے جاں بحق ہوگئے تھے۔
ڈی آئی جی انویسٹی گیشن عمران کشور نے بتایا کہ گرفتار ملزمان قتل، اقدام قتل کے متعدد مقدمات میں ریکارڈیافتہ ہیں، جبکہ ملزمان سے پسٹل، رائفل، گولیاں اور کارتوس برآمد کرلئے ہیں۔
واضح رہے کہ پاکستان کے 76 ویں جشن آزادی کے موقع پر رات گئے کراچی میں ہونے والی ہوائی فائرنگ سے ایک خاتون سمیت 2 افراد جاں بحق اور 60 سے زائد افراد زخمی ہوگئے تھے۔
کراچی میں رات 12 بجتے ہی شہر کے مختلف علاقوں میں ہوائی فائرنگ کاسلسلہ شروع ہوا اور پورا شہر گونج اٹھا، فائرنگ کا سلسلہ وقفے وقفے سے جاری رہا۔
پولیس ذرائع کا کہنا تھا کہ کراچی میں جشن آزادی کے موقع پر ہوائی فائرنگ کے مختلف واقعات میں ایک خاتون سمیت 2 افراد جاں بحق ہوئے، نمائش چورنگی میں نامعلوم سمت سے گولی لگنے سے بسمہ نامی خاتون جاں بحق ہوئی۔
لیاری میں نامعلوم سمت سے گولی لگنے سے عبدالوہاب نامی شخص جاں بحق ہوا، مختلف علاقوں میں ہوائی فائرنگ کی زد میں آکر خواتین، بچوں سمیت 60 سے زائد افراد زخمی ہوئے۔
پولیس حکام کے مطابق ہوائی فائرنگ سے متاثرہ 29 زخمی جناح اسپتال لائے گئے، ہوائی فائرنگ کے واقعات میں اندھی گولیوں سے زخمی 24 زخمی سول اسپتال لائے گئے اس کے علاوہ عباسی شہید اسپتال میں ہوائی فائرنگ کے 9 زخمی لائے گئے تھے۔
