الیکشن کمیشن نے نگراں وزیراعلیٰ اور چیف سیکریٹری پنجاب کو خط لکھتے ہوئے کہا ہے کہ نگراں حکومت پالیسی سے متعلق بڑے فیصلے نہیں لے سکتی۔
اے آر وائی نیوز کے مطابق الیکشن کمیشن نے پنجاب کی نگراں حکومت کو بڑےاقدامات سے متعلق فیصلے لینے پر خبردار کیا ہے، الیکشن کمیشن کا خط میں کہنا تھا کہ پنجاب کی نگراں حکومت بڑے اقدامات سے متعلق فیصلے لے رہی ہے۔
الیکشن کمیشن کے مطابق نگراں حکومت پالیسی سے متعلق بڑے فیصلے نہیں لے سکتی، نگراں حکومت کا کام صرف ڈے ٹو ڈے افیئرز چلانا ہے۔
ڈپٹی کمشنرز گرین بیلٹ پر ہاؤسنگ سوسائٹیز کو این او سی دے رہے ہیں، یہ کام نگراں حکومت کا نہیں صرف منتخب حکومت ایسے فیصلے کر سکتی ہے۔
الیکشن کمیشن نے حکم دیتے ہوئے کہا کہ ہاؤسنگ سوسائٹیز کو این او سی دینا فوری طور پربند کیا جائے، ڈپٹی کمشنرزکو اس حوالے سے فوری ہدایات جاری کی جائیں۔
الیکشن کمیشن کا پنجاب حکومت کو لکھے گئے خط میں کہنا تھا کہ الیکشن کمیشن توقع کرتا ہے کہ نگراں حکومت آئین اور قانون کے مطابق فیصلے کرے گی۔
