پاکستانی شوبز انڈسٹری کے اسٹار عمران عباس کا بالی وڈ کی نامور اداکارہ امیشا پٹیل کیلیے خصوصی پیغام سوشل میڈیا پر سب کی توجہ کا مرکز بن گیا۔
امیشا پٹیل حال ہی میں ریلیز ہونے والی فلم ’غدر 2‘ میں اداکار سنی دیول کے ساتھ جلوہ گر ہوئیں۔ 11 اگست کو نمائش کیلیے پیش کی جانے والی یہ فلم اب تک 300 کروڑ روپے سے زیادہ کا بزنس کرنے میں کامیاب ہوگئی۔
امیشا پٹیل اور عمران عباس ایک دوسرے کے اچھے دوست ہیں اور دونوں نے ایک ساتھ امریکا میں تعلیم بھی حاصل کی ہے۔ اداکار نے اپنی دوستی کی فلم کی کامیابی پر خوشی کا اظہار کیا ہے۔
عمران عباس نے انسٹاگرام اسٹوری پر لکھا کہ ’میں آپ کیلیے بہت خوش ہوں۔‘ انہوں نے اپنے اس میں فلم کا تو ذکر نہیں کیا لیکن عام خیال ہے کہ اداکار نے ’غدر 2‘ کی زبردست کامیابی پر خوشی کا اظہار کیا۔
گزشتہ سال ستمبر میں دونوں کی ایک ویڈیو سوشل میڈیا پر خوب وائرل ہوئی تھی جس میں وہ فلم ’کرانتی‘ کے گانے ’دل میں درد سا جگا ہے‘ پر اداکاری کر رہے تھے۔
مذکورہ ویڈیو وائرل ہونے کے بعد دونوں میں معاشقے کی خبریں سامنے آئی تھیں۔ بعدازاں امیشا پٹیل نے ایک انٹرویو میں ان خبروں پر اپنے ردعمل کا اظہار کیا تھا۔
اداکارہ کا کہنا تھا کہ ’عمران عباس سے اچھی دوستی ہے اور ہم دونوں نے امریکا میں ایک ساتھ تعلیم حاصل کی۔ معاشقے کی خبریں پڑھ کر ہنسی نکل گئی۔ یہ سب بکواس ہے۔ میں اپنے دوست کے ساتھ کئی سالوں بعد ملی تھی۔‘
