پاکستان کرکٹ بورڈ کی منیجمنٹ کمیٹی کے سربراہ ذکا اشرف نے آئی سی سی فنانشل ماڈل پر ارکان کو اعتماد میں لے لیا۔
تفصیلات کے مطابق پاکستان کرکٹ بورڈ کی منیجمنٹ کمیٹی کا اجلاس ہوا جس میں کمیٹی کے دس میں سے دو ارکان مصطفی رمدے اور ذوالفقار ملک اجلاس میں آن لائن کے ذریعے شریک ہوئے۔
ویل چیئر اور بلائنڈ کرکٹ کی 70،70 لاکھ روپے گرانٹ کی منظوری دی گئی۔ سندھ سے تعلق رکھنے والے ارکان نے اجلاس میں متفقہ طور پر مالی سال 2023-24 کا بجٹ منظور کرلیا۔
چیرمین ذکا اشرف نے ارکان کو آئی سی سی کے حالیہ اجلاس میں اپنی شرکت کے بارے میں تفصیلات سے آگاہ کیا۔
آئی سی سی کے فنانشل ماڈل سے متعلق ہونے والی اپنی گفتگو کے بارے میں بھی ارکان کو بتایا۔ مختلف اسٹیڈیم کے اسٹینڈز میں کرسیاں نصب کی جائیں گی اور ان کی مرمت کی جائے گی۔
پنڈی کرکٹ اسٹیڈیم میں کرسیوں کی تنصیب بھی شامل ہے۔ اجلاس میں اسٹیڈیمز میں سولر پینلز کی تنصیب کی تجویز بھی منظور کرلی گئی۔
