کراچی: قومی ایئر لائن کی انتظامیہ کی جانب سے 8 ارب روپے سے زائد ٹیکس کی عدم ادائیگی کے معاملے میں ایف بی آر نے پی آئی اے انتظامیہ کے خلاف کارروائی کے لیے ڈی جی ایف آئی اے کو مراسلہ لکھ دیا ہے۔
تفصیلات کے مطابق ایف بی آر نے پی آئی اے کی اعلیٰ انتظامیہ پر منی لانڈرنگ، کرپشن چھپانے اور فارن ایکسچینج ریگولیشن کی خلاف ورزی کے سنگین الزامات عائد کر دیے ہیں، ریونیو ادارے کا کہنا ہے کہ پی آئی اے کے چیف فنانشل آفیسر اور جنرل منیجر اکاؤنٹنگ غیر قانونی کام میں ملوث ہیں۔
ایف بی آر کی جانب سے لکھے گئے مراسلے کے مطابق قومی ایئرلائن فیڈرل ایکسائز ڈیوٹی کی مد میں 8 ہزار 845 ملین کی نادہندہ ہے، جب کہ ایئر لائن گزشتہ کئی ماہ سے واجبات ادا کرنے سے گریزاں نظر آ رہی ہے، اور اس کی انتظامیہ مبینہ طور پر سرکاری فنڈز کے خرد برد میں ملوث ہے۔
ایف بی آر نے پی آئی اے کے 26 اکاؤنٹس منجمد کر دیے
یہ مراسلہ ڈپٹی کمشنر اِن لینڈ ریونیو زون ون کراچی کی جانب سے اینٹی منی لانڈرنگ ایکٹ کے تحت تحقیقات کے لیے ارسال کیا گیا ہے، جس کی کاپی چیف فنانشل آفیسر کو بھی فراہم کی گئی ہے۔ مراسلے میں کہا گیا ہے کہ پی آئی اے کی سینئر انتظامیہ پاکستان پینل کوڈ کی دفعہ 403 اور 409 کی خلاف ورزی کی مرتکب ہو رہی ہے، اور اینٹی منی لانڈرنگ ایکٹ کی خلاف ورزی کی جا رہی ہے۔
