پاکستان شوبز انڈسٹری کے معروف اداکار سعود قاسمی نے بھارتی اداکار نواز الدین صدیقی سے متعلق اہم انکشاف کرتے ہوئے کہا ہے کہ وہ ان کے رشتے دار ہیں۔
سینئر اداکار سعود قاسمی ایک پوسٹ کاڈ میں بطور مہمان شریک ہوئے، جس میں انہوں نے اپنی زندگی کے مختلف پہلوؤں کے حوالے سے اپنے چاہنے والوں کو آگاہ کیا۔
سعود قاسمی نے بتایا کہ بھارتی اداکار نواز الدین صدیقی اور آسٹریلوی کرکٹر عثمان خواجہ ان کے رشتہ دار ہیں۔ انہوں نے کہا کہ یہ بات میں نے اس سے پہلے کبھی نہیں بتائی۔
سینئر اداکار کا کہنا تھا آسٹریلیا کے کرکٹر عثمان خواجہ بھی میرے رشتے دار ہیں بلکہ ہم دونوں بچپن میں ایک ساتھ کرکٹ بھی کھیل چکے ہیں، انہوں نے بتایا کہ بھارت میں مقیم میرے خالہ زاد بھائی کی شادی نواز الدین صدیقی کی بہن سے ہوئی ہے۔
سعود قاسمی نے کہا کہ میری بہن نے جویریہ کو پسند کیا تھا اور اس کے بعد جویریہ کے والدین کو منانے کے لیے 4 بار ان کے گھر جانا پڑا، جبکہ اپنی شادی سے متعلق انہوں نے بتایا کہ جویریہ سے میری شادی گھر والوں کی مرضی سے ہوئی تھی۔
سینئر اداکار نے انکشاف کیا کہ جویریہ کے گھر شادی کی بات کرنے کے لئے جانے والوں میں شہید امجد صابری مرحوم، اداکار رینبو، اداکار شان اور برگیڈیئر (ر) حارث نواز بھی شامل تھے۔
