کراچی: برطانیہ کی جانب سے تحفے میں ملنے والی جدید اسکیننگ مشین لاہور ایئرپورٹ پر نصب کر دی گئی۔
تفصیلات کے مطابق برطانیہ کی جانب سے پاکستانی ایئر پورٹس کے لیے جدید اسکیننگ مشینوں کا تحفہ دیا گیا ہے، جدید اسٹیٹ آف آرٹ اسکیننگ مشین علامہ اقبال انٹرنیشنل ایئرپورٹ پر نصب کر دی گئی۔
ڈائریکٹر سیکیورٹی سی اے اے شاہد قادر کا کہنا ہے کہ برطانوی سیکیورٹی ایجنسی ڈی ایف ٹی کی جانب سے جدید ٹیکنالوجی سے آراستہ یہ بیگجز مشین تحفہ کے طور پر دی گئی ہے۔
سی اے اے کے مطابق جدید مشین مسافروں کے سامان کے ساتھ ساتھ جہاز کے لیے نقصان دہ آلات اور بارودی مواد کو جانچنے کی صلاحیت بھی رکھتی ہے۔
برطانوی ہائی کمشنر لاہور ایئرپورٹ پر باضابطہ طور پر اس مشین کا افتتاح کریں گی، اور کراچی کے بعد لاہور میں بھی جدید اسکین مشین کا نظام ایئرپورٹ سیکیورٹی فورس کے حوالے کر دیا جائے گا۔
واضح رہے کہ برطانیہ کی ڈی ایف ٹی کی جانب سے کراچی کے بعد لاہور ایئرپورٹ پر یہ مشین نصب کی گئی ہے، جس سے لاہور سے برطانیہ جانے والے مسافروں کے سامان کی جدید طرز پر اسکیننگ ہو سکے گی۔
