کراچی:کراچی کے علاقے گلشن بونیر میں رینجرز سے فائرنگ کے تبادلے میں کالعدم تنظم کا دہشت گرد مارا گیا جسے قاری عبدالرحمان کے نام سے شناخت کیا گیا ہے، اس کے سر کی قیمت پندرہ لاکھ روپےتھی ۔
رینجرز ترجمان کے مطابق کراچی کےعلاقے لانڈھی گلشن بونیر میں رینجرز نے کالعدم تنظیم کے دہشت گردوں کی موجودگی کی اطلاع پر سرچ آپریشن کیا۔ آپریشن کے دوران ملزمان اور رینجرز اہلکاروں کے درمیان فائرنگ کے تبادلےمیں کالعدم تنظیم سےتعلق رکھنے والا ملزم قاری عبدالرحمان مارا گیا۔ ترجمان رینجرز کے مطابق ملزم شہر میں متعدد بم دھماکوں اور ٹارگٹ کلنگ کی کئی وارداتوں میں ملوث تھا۔
سندھ حکومت نے ہلاک ملزم کے سر کی قیمت پندرہ لاکھ روپے مقرر کر رکھی تھی۔ مقابلے کے دوران دو دہشت گردوں کو گرفتار بھی کرلیا اور ان کے قبضے سے بھاری اسلحہ بھی برآمد کیا گیاہے۔
