کراچی : سیشن عدالت نے کلے الیکٹرک عملے پر تشدد کیخلاف مقدمے میں تاجر رہنما شرجیل گوپلانی کی عبوری ضمانت میں توسیع کردی۔

تفصیلات کے مطابق سیشن عدالت میں کے الیکٹرک عملے پر تشددکیخلاف مقدمے کی سماعت ہوئی ، تاجر رہنما شرجیل گوپلانی و دیگر رہنما عدالت میں پیش ہوئے۔

وکیل کے الیکٹرک نے کہا کہ شرجیل گوپلانی کی درخواست ضمانت مسترد کی جائے ،شرجیل گوپلانی اور انکے ساتھیوں نے عملے پر تشدد کیا ، جس پر وکیل شرجیل گوپلانی کا کہنا تھا کہ پولیس نے مقررہ وقت گزرنے کے باوجود چالان جمع نہیں کرایا ایسے کوئی شواہد موجود ہی نہیں کہ تشدد ہوا۔

شرجیل گوپلانی نے عدالت کو بتایا کہ تاجر رہنما اور ان کے ساتھیوں نے تو کے الیکٹرک کی ٹیم کو بچایا ، درخواست ضمانت پر وکلا نے دلائل مکمل کر لئے، جس کے بعد عدالت نے فیصلہ محفوظ کرلیا۔

عدالت نے صدر ٹمبر مارکیٹ شرجیل گوپلانی کی عبوری ضمانت میں توسیع کردی اور کہا درخواست ضمانت پر فیصلہ 18 ستمبر کو سنایا جائے گا، ملزم شرجیل گوپلانی کے خلاف نیپئر تھانے میں مقدمہ درج ہے۔