کراچی میں ڈاکووں کی دیدہ دلیری کا ایک اور واقعہ پیش آگیا۔ مسلح افراد نے درجنوں ملازمین کو لوٹ لیا۔
پولیس کے مطابق شاہ فیصل کالونی نمبر 3 میں لیدر فیکٹری کے70ملازمین کو لوٹ لیا گیا۔ گزشتہ روز لیدر گارمنٹس فیکٹری کورنگی کے ملازمین بس میں جا رہے تھے کہ 3موٹر سائیکلوں پر سوار 6 مسلح ملزمان 65 موبائل فون لوٹ کر فرار ہوگئے۔
پولیس کا کہنا ہے کہ متاثرین میں 8 خواتین، 62 مرد ملازمین اور بس ڈرائیور شامل ہیں۔ بس ڈرائیور کے آنے پر مقدمہ درج کیا جائے گا۔
واضح رہے کہ کراچی میں لوٹ مار اور موٹرسائیکل چوری کی وارداتوں کو روکنے کے لیے پولیس، اینٹی وہیکلز لیفٹنگ سیل سمیت دیگر ادارے بھرپور کارروائیاں کر رہے ہیں تاہم تابڑتوڑ کارروائیوں کے باوجود شہر میں مسلح وارداتوں میں کمی نہیں آرہی۔
