اسلام آباد : سپریم کورٹ کے نیب ترامیم کالعدم قرار دینے کے فیصلے کے بعد نگران وزیراعظم انوار الحق کاکڑ کا کیس بھی بحال ہو جائے گا۔
تفصیلات کے مطابق سپریم کورٹ کی جانب سے نیب ترامیم کالعدم قرار دینے کے فیصلے سے نگران وزیراعظم انوار الحق کاکڑ کا کیس بھی بحال ہو جائے گا۔
انوار الحق کاکڑ پر این جی او کے ذریعے کروڑوں روپے کی مبینہ کرپشن کا الزام تھا، نیب کوئٹہ نے 2020 میں انوارالحق کاکڑ کے خلاف انکوائری شروع کی تھی اور ڈی جی آپریشنز کی ہدایت پر انکوائری بند کرنے کی سفارش کی تھی۔
خیال رہے سپریم کورٹ کی جانب نیب ترامیم کالعدم قرار دیے جانے کے بعد عوامی عہدے رکھنے والی بہت سی شخصیات کے کیسز بحال ہوگئے، ان میں سابق صدر اور چھ سابق وزرائے اعظم شامل ہیں۔
نوازشریف، شہبازشریف، آصف زرداری اوریوسف رضا گیلانی کا توشہ خانہ کیس جبکہ آصف زرداری کیخلاف پنک ریزیڈنسی ریفرنس بھی بحال ہوگیا۔
شاہدخاقان عباسی کاایل این جی کیس احتساب عدالت منتقل ہوگا جبکہ راجہ پرویزاشرف کےخلاف رینٹل پاورکیسزبھی بحال ہوں گے۔
اسحاق ڈارکیخلاف آمدن سےزائداثاثہ جات ریفرنس احتساب عدالت کو منتقل ہوگا اور جعلی اکاؤنٹس کےمرکزی ملزم،عبدالغنی مجیداورانورمجیدکے مقدمات بھی بحال ہوگئے ہیں۔
