اسلام آباد: کاروباری سرگرمیوں میں سست روی کا سلسلہ جاری ہے، رواں مالی سال کے پہلے ماہ میں بڑی صنعتوں کی پیداوار میں 1.09 فی صد کی کمی ریکارڈ کی گئی۔
تفصیلات کے مطابق ادارہ شماریات نے بڑی صنعتوں کی پیداوار کے ماہانہ اعداد و شمار جاری کر دیے، گزشتہ سال جولائی کے مقابلے میں جولائی 2023 میں صنعتی پیداوار میں 1.09 فیصد کی کمی ریکارڈ کی گئی ہے۔
جون 2023 کے مقابلے میں جولائی میں بڑی صنعتوں کی پیداوار میں 3.62 فی صد کی کمی ہوئی، رواں مالی سال جولائی میں آٹو موبیل سیکٹر کی پیداوار میں 66.11 فی صد کی بڑی کمی ہوئی، فرنیچر کی صنعتی پیداوار میں 57.83 فی صد کمی ریکارڈ کی گئی، پٹرولیم مصنوعات کی پیداوار میں بھی 2.26 فی صد کمی ریکارڈ کی گئی۔
ادارہ شماریات کے مطابق کاٹن یارن کی پیداوار میں 29.88 فی صد اور کاٹن کے کپڑوں کی پیداوار میں 17.52 فی صد کی کمی ریکارڈ کی گئی۔ کمپیوٹر الیکٹرانکس کی پیداوار میں 32.13 فی صد کی کمی ہوئی، الیکڑیکل ایکوئپمنٹ کی پیداوار میں 22.38 فی صد کمی ہوئی، ٹیکسٹائل کی صنعتوں کی پیداوار میں 22 فی صد کمی ہوئی۔
دوسری طرف فارماسیوٹیکلز صنعتوں کی پیداوار 54.22 فی صد بڑھی، تمباکو کی صنعت میں پیداوار 53.97 فی صد بڑھی، اور فرٹیلائزر سیکٹر کی پیداوار میں 26.06 فی صد کا اضافہ، گارمنٹس کی پیداوار میں 30.84 فی صد کا اضافہ، سیمنٹ کی پیداوار میں 38.60 اور کھاد کی پیداوار میں 26 فی صد سے زائد کا اضافہ ہوا۔
