نیویارک : نگراں وزیر اعظم انوار الحق کاکڑ نے زور دیا کہ پائیدار ترقیاتی اہداف کے حصول کیلئے کمزور ممالک کو وسائل فراہم کرنا ہوں گے۔

تفصیلات کے مطابق نیویارک میں اقوام متحدہ کے زیر اہتمام پائیدار ترقیاتی اہداف سے متعلق لیڈرز ڈائیلاگ کا انعقاد کیا گیا ، نگراں وزیراعظم انوار الحق کاکڑ نے ترقیاتی اہداف کیلئے وسائل اور سرمایہ کاری سے متعلق مباحثے سے خطاب کیا۔

انوارالحق کاکڑ نے اپنے خطاب میں کہا کہ ترقی پذیر ملکوں کوترقیاتی اہداف کے حصول میں وسائل کی کمی کا سامنا ہے، پائیدار ترقیاتی اہداف کے حصول کیلئے کمزور ممالک کو وسائل فراہم کرنا ہوں گے۔

نگراں وزیراعظم نے زور دیا کہ پائیدار ترقی کیلئے یکساں ترقی ضروری ہے ، قرض میں پھنسے ممالک کیلئے لائحہ عمل تیار کرنا ہوگا، 500 ارب ڈالرز کے ایس ڈی آرز کوقرض ادائیگی سے مشروط کیا جاسکتا ہے۔

یاد رہے گذشتہ روز نگراں وزیراعظم انوار الحق کاکڑ نے امریکا میں مصروف دن گزارا، جنرل اسمبلی کے اٹہھترویں اجلاس کی افتتاحی تقریب میں شرکت کی۔

وزیراعظم نےعالمی ترقیاتی تعاون سے متعلق اجلاس میں کہا تھا کہ چین کابیلٹ اینڈ روڈاقدام اورسی پیک پائیدارترقیاتی اہداف کے حصول میں اہمیت کاحامل ہے۔

انوار الحق کاکڑ نے یواین اعلیٰ سطح مباحثے کے افتتاحی اجلاس میں بھی شرکت کی جبکہ ایرانی صدرسے ملاقات میں دوطرفہ اموراورخطے کی صورتحال پرتبادلہ خیال کیا۔