اسلام آباد : ایڈیشنل سیشن جج نے اہلیہ کوقتل کرنیوالے ملزم کو سزائے موت کا حکم دے دیا، ملزم سکندر جان نے 2 سال قبل خلع لینے پر فائرنگ کرکے اہلیہ کو قتل کیا تھا۔
تفصیلات کے مطابق سیشن کورٹ میں اہلیہ کو قتل کرنیوالے شوہر کیخلاف کیس کی سماعت ہوئی ، ایڈیشنل سیشن جج فرخ فرید بلوچ نے کیس کی سماعت کی۔
وکیل میاں احمد خان نے بتایا کہ واقعےکےچشم دید گواہ موجود ہیں،آلہ قتل بھی برآمد ہوا ہے ، ملزم نے اہلیہ دلشاد بی بی کو فائرنگ کر کےقتل کیا، جس کا مقدمہ تھانہ کھنہ میں درج ہے۔
عدالت نے اہلیہ کوقتل کرنیوالے ملزم کو جرم ثابت ہونے پر سزائے موت کا حکم دے دیا جبکہ ملزم کو ناجائزاسلحہ کے مقدمےمیں بھی 5 سال قید کی سزا سنا دی۔
عدالت کی جانب سے ملزم کو مجموعی طور پر 10 لاکھ روپے جرمانےکی سزا بھی سنائی گئی۔
یاد رہے ملزم سکندر جان نے 2 سال قبل خلع لینے پر فائرنگ کرکے اہلیہ کو قتل کیا تھا۔