اسلام آباد: یکم اکتوبر سے پٹرول اور ڈیزل پر تیل کمپنیوں اور ڈیلرز کا مارجن مزید بڑھانے کی تیاریاں کی جا رہیں۔

تفصیلات کے مطابق ذرائع نے کہا ہے کہ ہائی اسپیڈ ڈیزل پر پٹرولیم لیوی میں بھی 5 روپے اضافے کا امکان ہے، ڈیزل لیوی بڑھانے سے فی لیٹر لیوی 50 سے 55 روپے فی لیٹر ہو جائے گی۔

ذرائع کے مطابق پٹرول اور ڈیزل پر مارجن میں 88 پیسے فی لیٹر مزید اضافے کی تجویز ہے، تیل کمپنیوں کا مارجن 47 پیسے فی لیٹر بڑھایا جائے گا، جب کہ ڈیلرز مارجن میں فی لیٹر 41 پیسے اضافے کی تجویز ہے۔

نگراں حکومت کے دور میں پہلی مرتبہ پٹرول اور ڈیزل سستا ہونے کا امکان

ذرائع کا کہنا ہے کہ 16 ستمبر کو بھی پیٹرول، ڈیزل پر او ایم سی اور ڈیلرز مارجن فی لیٹر 88 پیسے بڑھایا جا چکا ہے، جس سے پٹرول پر او ایم سی مارجن 6.47 روپے سے بڑھ کر 6.94 روپے فی لیٹر ہو جائے گا۔

پٹرول اور ڈیزل دونوں پر ڈیلرز مارجن 7.41 روپے سے بڑھ کر 7.82 روپے فی لیٹر ہو جائے گا، جب کہ ڈیزل پر او ایم سی مارجن 6.70 روپے سے بڑھ کر 7.17 روپے فی لیٹر ہو جائے گا۔