اوستہ محمد: اے آر وائی نیوز کی خبر کے بعد بلوچستان کے ضلع اوستہ محمد کے سیلاب متاثرین کو زائد المیعاد اشیا کی فراہمی کا انکشاف ہوا ہے۔
تفصیلات کے مطابق اوستہ محمد کے سیلاب متاثرین کے ساتھ انتظامیہ نے بھونڈا مذاق شروع کر دیا، اے آر وائی نیوز نے 4 دن پہلے متاثرین کی زبوں حالی کی رپورٹ نشر کی تھی، جس کے بعد انتظامی عجلت کے نتیجے میں ناکامی چھپانے کے لیے متاثرین کو ناکارہ اشیا کی فراہمی شروع کر دی گئی ہے۔
متاثرین کو دی جانے والی بیش تر اشیا زائد المیعاد ہونے کا انکشاف ہوا ہے، جس پر متاثرین میں غم و غصے کی لہر دوڑ گئی ہے۔
- Advertisement -
ذرائع کا کہنا ہے کہ تقسیم کردہ سامان سرکاری گودام میں کافی عرصے سے پڑا ہوا تھا، یہ امدادی سامان کب آیا تھا اور اسے تقسیم کیوں نہیں کیا گیا، انتظامیہ کے رویے پر اس قسم کے سنگین سوالات اٹھ گئے ہیں۔
