ورلڈ کپ میں آسٹریلیا کو بھارت کے بعد جنوبی افریقہ نے بھی شکست دے دی، یہ ورلڈ کپ میں آسٹریلیا کی مسلسل دوسری شکست ہے۔
لکھنؤ میں کھیلے گئے میچ میں جنوبی افریقہ کی جانب سے دیے گئے 312 رنز کے تعاقب میں آسٹریلوی ٹیم 40.5 اوورز میں 177 رنز پر ڈھیر ہوگئی، کوئنٹن ڈی کاک کو شاندار سنچری پر میچ کا بہترین کھلاڑی قرار دیا گیا۔
مارنس لبوشین کے 46 اور مچل اسٹارک کے 27 رنز کے علاوہ کوئی کھلاڑی خاطر خواہ کارکردگی نہ دکھا سکا۔
اوپنر مچل مارش 7 رنز بنا کر آؤٹ ہوئے، ڈیوڈ وارنر نے 13 رنز بنائے، اسٹیو اسمتھ 19 رنز بنا کر ربادا کو وکٹ دے بیٹھے، جوش انگلس 5 رنز بنا پر بولڈ ہوئے۔
آسٹریلوی آل راؤنڈر گلین میکسویل 3 اور مارکس اسٹونس صرف 5 رنز بنا کر پویلین لوٹ گئے۔
جنوبی افریقہ کی جانب سے کیگیسو ربادا نے تین وکٹیں حاصل کیں، مارکو جینسن، کیشو مہاراج اور تبریز شمسی نے دو، دو وکٹیں حاصل کیں۔
اس سے قبل جنوبی افریقہ نے پہلے بیٹنگ کرتے ہوئے مقررہ اوورز میں 7 وکٹوں کے نقصان پر 311 رنز بنائے اور آسٹریلیا کو جیت کے لیے 312 رنز کا ہدف دیا تھا۔
کوئنٹن ڈی کاک نے 106 گیندوں پر 109 رنز کی شاندار اننگز کھیلی۔
View this post on Instagram
ایڈن مارکرم 56 رنز کے ساتھ نمایاں رہے، کپتان ٹیمبا باووما 55 گیندوں پر 35 رنز بنا کر میکسویل کو وکٹ دے بیٹھے۔
View this post on Instagram
رسی وین ڈر ڈون 26 رنز پر ایڈم زمپا کا نشانہ بنے، ہینرک کلاسن 29 رنز بنا کر آؤٹ ہوئے، ڈیوڈ ملر کو 17 رنز پر مچل اسٹارک نے کلین بولڈ کیا۔
View this post on Instagram
آسٹریلیا کی جانب سے مچل اسٹارک اور گلین میکسویل نے دو، دو وکٹیں حاصل کیں، جوش ہیزل ووڈ، پیٹ کمنز اور ایڈم زمپا ایک، ایک وکٹ حاصل کرسکے۔
View this post on Instagram
واضح رہے کہ جنوبی افریقہ نے پہلے میچ میں سری لنکا کو شکست دی تھی جبکہ آسٹریلیا کو بھارت سے شکست کا سامنا کرنا پڑا تھا۔