کراچی : عالمی ہوا بازی کی تنظیم اکاؤ آج سے سول ایوی ایشن (سی اے اے) کا سیفٹی آڈٹ شروع کرے گی، آڈٹ میں کامیابی کے بعد پاکستان ایئرلائنز کی یورپ اور برطانیہ میں پروازیں بحال ہوجائیں گی۔
تفصیلات کے مطابق پی آئی اے پر برطانیہ سمیت یورپ میں عائد پابندی ختم ہونے کا امکانات روشن ہوگئے، عالمی ہوا بازی کی تنظیم اکاؤ کی 7 رکنی ٹیم پاکستان کے دورے پر پہنچ گئی ، انٹرنیشنل سول ایوی ایشن آرگنائزیشن ٹیم ریجنل ڈائریکٹر منجیت سنگھ کی سربراہی میں گزشتہ رات پہنچی۔
اکاؤ ٹیم آج سے سی اے اے کا سیفٹی آڈٹ شروع کرے گی ، انٹرنیشنل سول ایوی ایشن آرگنائزیشن ٹیم 10 نومبر تک لائسنسنگ، فلائٹ سیفٹی، فلائٹ اسٹینڈرڈ اور ایئرٹریفک کنٹرول کا آڈٹ کرے گی۔
عالمی ہوا بازی کی تنظیم اکاؤ سی اے اے ہیڈکوارٹرز سمیت کراچی لاہور ایئرپورٹ کا بھی دورہ کرے گی اور ٹیم 10 نومبر تک آڈٹ کرنے کے بعد روانہ ہوگی۔
اکاو کے فوری بعد یورپی ایوی ایشن اوربرطانوی ٹیم بھی آڈٹ کرے گی ، آڈٹ میں کامیابی کےبعدپاکستان ایئرلائنز کی یورپ اور برطانیہ میں پروازیں بحال ہوجائیں گی۔
جولائی 2020 سے پی آئی اے سمیت تمام پاکستانی ایئرلائنز کی پروازوں پریورپ اوربرطانیہ میں پابندی ہے۔
