لاہور: ترجمان پنجاب حکومت نے پیپلز پارٹی کے چیئرمین بلاول بھٹو زرداری کے الزامات کی تردید کرتے ہوئے کہا ہے کہ پنجاب کا موازنہ سندھ سے کرنا سراسر غلط ہے۔
اس حوالے سے ترجمان پنجاب حکومت کا کہنا ہے کہ پنجاب حکومت پچھلے ساڑھے9ماہ سے کام کررہی ہے، اس کاموازنہ سندھ سے کرنا سراسر غلط ہے۔
انہوں نے کہا کہ سندھ حکومت اپنی مدت پوری ہونے کے بعد تحلیل ہوئی ہے، اس کو تحلیل ہوئے ڈھائی ماہ کاعرصہ ہوا ہے، پنجاب حکومت نے جو بھی منصوبے کیے وہ کسی بھی طرح سیاسی نہیں۔
ترجمان کے مطابق الیکشن کمیشن ہر طرح سے تسلی کرتا ہے کہ کوئی بھی منصوبہ سیاسی نہ ہو، الیکشن کمیشن اپنی تسلی کرنے کے بعد ہی منصوبے کی منظوری دیتا ہے۔
ان کا کہنا تھا کہ اسپتالوں کی حالت بہتر کرنے کی اجازت سندھ حکومت بھی مانگے گی تو ملے گی، پنجاب حکومت نے سابق ایم این اے، ایم پی ایز کے ترقیاتی کام روک دیے۔
ترجمان نے مزید کہا کہ پنجاب حکومت مکمل طور پرغیرجانبدار ہے، کسی قسم کے سیاسی ایجنڈے کے بغیر عوام کو ریلیف کیلئے سرگرم عمل ہیں۔
