اگر آپ اپنی روز مرہ کی غذا میں زیادہ نمک استعمال کررہے ہیں تو آپ کو یہ جاننا ضروری ہے کہ زیادہ نمک کا استعمال آپ کی صحت کے لئے انتہائی خطرناک ثابت ہوسکتا ہے، یہ بات ہر کوئی نہیں جانتا کہ کس طرح معلوم کیا جائے کہ ہمارے جسم میں نمک کی مطلوبہ مقدار مناسب ہے یا نہیں۔
کھانے میں بہت زیادہ نمک استعمال کرنے سے ہائی بلڈ پریشر کے خطرات بڑھ جاتے ہیں اور اس کے علاوہ بھی کئی علامات ہیں جن سے پتہ چل جاتا ہے کہ آپ اپنی غذا میں زیادہ نمک کا استعمال کررہے ہیں، ان علامات میں سے ایک ہاتھوں اور پیروں کا ورم ہے۔
نیشنل ہیلتھ سروسز کے مطابق یہ سوجن خود ہی ختم ہو سکتی ہے لیکن اگر یہ چند دنوں میں ختم نہ ہو تو یہ خطرے کی علامت ہے۔
نمک جسم میں پانی کی مقدار میں اضافہ کردیتا ہے جس کے باعث ٹخنوں، پیروں اور ٹانگوں میں سوجن ہو سکتی ہے۔
انسٹی ٹیوٹ کی جانب سے جاری کردہ گائیڈ لائنز میں بتایا گیا ہے کہ ضعیف العمر افراد کو روزانہ 6 گرام سے زیادہ نمک استعمال نہیں کرنا چاہئے۔
این ایچ ایس کی ماہر غذائیت اولیویا برلی کا اس حوالے سے کہنا ہے کہ جب نمک کی مقدار زیادہ ہوتی ہے تو جسم میں اضافی سوڈیم موجود ہوتا ہے اور خلیوں کے گرد سیال کی مقدار میں اضافہ ہوجاتا ہے، جس سے گردے کم کارآمد ہو جاتے ہیں۔ جو بالآخر بلڈ پریشر میں اضافے کاباعث بنتا ہے۔
یہ حالت دل کی بیماری، دل کے دورے اور فالج کے ساتھ ساتھ شریانوں کی سوزش، گردے کی بیماری اور ڈیمنشیا کے خطرات بڑھا سکتی ہے، اس کی بنیادی وجہ زیادہ نمک کا استعمال ہے۔
