ہیوسٹن : سابق صدر ڈونلڈ ٹرمپ نے دعویٰ کیا ہے کہ پاکستان کے سابق وزیراعظم نے ایرانی کمانڈر قاسم سلیمانی کے قتل کے واقعے کو اپنی زندگی کا سب سے بڑا لمحہ قرار دیا تھا۔
تفصیلات کے مطابق سابق امریکی صدر ڈونلڈ ٹرمپ نے ہیوسٹن میں انتخابی ریلی سے خطاب کرتے ہوئے سابق وزیراعظم سے ملاقات کا ذکر کرتے ہوئے کہا کہ خان جو کرکٹ کے بہترین کھلاڑی تھے اور پاکستان کے سربراہ بنے تھے۔
ڈونلڈ ٹرمپ نے دعویٰ کیا کہ سابق وزیراعظم نے گفتگو کے دوران کہا تھا کہ یہ میری زندگی کا سب سے بڑا لمحہ تھا، جب میں نے سنا کہ قاسم سلیمانی کو قتل کردیا گیا ہے۔
سابق صدر نے مزید دعویٰ میں کہا انھوں نے بتایا کہ قاسم سلیمانی کے قتل کی خبر سننے کے بعد میں گھر چلاگیا تھا اور ایک ہفتے تک کام نہیں کرسکا تھا۔
یاد رہے 2020 میں بغداد میں ایرانی جنرل قاسم سلیمانی کو امریکا نے ایک ڈرون حملے میں راکٹوں کا نشانہ بنا کر ہلاک کر دیا تھا، جس کے بعد ایران نے بھی بغداد میں واقع امریکی فوجی اڈوں پر راکٹ برسائے تھے۔
بعد ازاں امریکی صدر ٹرمپ نے ایرانی جنرل قاسم سلیمانی پر حملے کی وجہ بتاتے ہوئے کہا تھا کہ سلیمانی ایران ہمارے چار سفارتخانوں کو نشانہ بنانا چاہتا تھا اور اس نے بغداد میں امریکی سفارتخانے کو نشانہ بنایا۔
ان کا کہنا تھا کہ یہ انکشاف کرسکتاہوں اور مجھے یقین ہے کہ یہ ہمارے چار سفارتخانے ہی ہوتے، ہم بتائیں گے کہ یہ بغداد میں ہمارے سفارتخانے کو نشانہ بنانے جارہے تھے۔
