دنیا کا سب سے مقبول میسجنگ پلیٹ فارم واٹس ایپ نے مختلف سیکشنز میں اشتہارات شامل کرنے کا عندیہ دے دیا۔
غیر ملکی خبر رساں ادارے کی رپورٹ کے مطابق واٹس ایپ کے سربراہ ول کیتھ کارٹ نے ایک انٹرویو میں اشارتاً کہا کہ بہت جلد واٹس ایپ میں اشتہارات شامل کیے جا سکتے ہیں۔
ان کا کہنا تھا کہ مذکورہ اشتہارات اسٹیٹس اور چینلز جیسی خصوصیات میں ظاہر ہو سکتے ہیں، اشتہارات ان باکس یا پیغام رسانی کی خصوصیات میں شامل نہیں ہوں گے لیکن انہوں نے یہ نہیں بتایا کہ یہ کب تک ممکن ہوگا۔
انہوں نے کہا کہ چینل آپریٹرز اپنے فالوورز سے ماہانہ فیس وصول کر سکتے ہیں اور اپنے چینلز میں اشتہارات بھی دکھا سکتے ہیں۔
واضح رہے کہ میٹا کی ملکیت والی میسجنگ ایپ گزشتہ کئی سال سے اشتہارات شامل کرنے پر غور کر رہی ہے۔ 2018 میں کمپنی نے عندیہ دیا تھا کہ اسٹیٹس فیچر میں اشتہارات شامل کیے جا سکتے ہیں لیکن اس منصوبے کو 2020 میں روک دیا گیا تھا کیونکہ کمپنی کو رازداری سے آگاہ صارفین کی جانب سے ردعمل کا خدشہ تھا۔
لیکن اب 3 سال بعد واٹس ایپ کے سربراہ نے ایک بار پھر میسجنگ ایپ میں اشتہارات شامل کرنے کا عندیہ دیا ہے، اب دیکھنا یہ ہے کہ کمپنی اس منصوبے کو کب عملی جامہ پہناتی ہے۔
