کراچی : سابق صدر اور پیپلز پارٹی کے شریک چیئرمین آصف زرداری نے نواز شریف پر طنز کرتے ہوئے کہا کہ کچھ لوگ اقتدار کیلئے اتحادی بناتے ہیں مگر ہمارے لئےعوام ہی کافی ہے۔
تفصیلات کے مطابق سابق صدر اور پیپلز پارٹی کے شریک چیئرمین آصف زرداری نے تھر میں جلسےکے انعقاد پر جیالوں کوخراج تحسین اور اظہار تشکر کرتے ہوئے کہا کہ بلاول بھٹو کا شاندار استقبال کرکے تھر کے عوام نے اپنا فیصلہ سنا دیا، تھر کے عوام اپنی بہن محترمہ بینظیر بھٹو شہید کو نہیں بھولے۔
آصف علی زرداری کا کہنا تھا کہ کچھ لوگ اقتدار کیلئےاتحادی بناتے ہیں مگر ہمارے لئےعوام ہی کافی ہے، پیپلزپارٹی کیخلاف ماضی میں بھی اتحاد بنائے گئے، ایسے اتحادوں کی پیپلزپارٹی کو کوئی پرواہ نہیں۔
پیپلز پارٹی کے شریک چیئرمین نے مزید کہا کہ قائد عوام ذوالفقار بھٹو شہید کا فلسفہ ہمارے لیئے مشعل راہ ہے، عام انتخابات میں پی پی ساحل سمندر سے لیکر کےپی تک کامیابی حاصل کرے گی۔
