لاہور: پنجاب کے شہر لاہور میں اسمارٹ لاک ڈاؤن کے باوجود فضائی آلودگی میں اضافہ کی شرح برقرار ہے۔
محکمہ ماحولیات کے مطابق لاہور شہر کا مجوعی ایئر کوالٹی انڈیکس 380 اے کیو آئی ریکارڈ کیا گیا ہے، دنیا بھر کے آلودہ ترین شہروں میں لاہور آج بھی سرفہرست ہے، شہر میں حکومت کی جانب سے اسمارٹ لاک ڈاؤن بھی نافذ کیا گیا ہے تاہم اس کے اثرات سامنے نہ آ سکے۔
ماہرین کی جانب سے شہریوں کو ماسک لگانے اور احتیاطی تدابیر کی ہدایت کی گئی ہے، نگراں وزیر اعلیٰ پنجاب محسن نقوی نے کہا ہے کہ اسموگ کنٹرول کے لیے متاثرہ علاقوں میں مصنوعی بارش بھی برسائی جائے گی۔
محکمہ موسمیات کے مطابق لاہور شہر کا موجودہ درجہ حرارت 14 ڈگری ریکارڈ کیا گیا ہے، آج لاہور میں زیادہ سے زیادہ درجہ حرارت 26، کم سے کم 13 تک جانے کا امکان ہے، شہر میں نمی کا تناسب 88 فی صد ریکارڈ کیا گیا ہے، جب کہ اگلے 24 گھنٹوں میں موسم خشک رہے گا، اور بارش کے امکانات موجود نہیں ہیں۔
