سدھارتھ ملہوترا نے ”کافی ود کرن 8“ میں کیارا یڈوانی کے ساتھ شادی شدہ زندگی کے بارے میں تفصیلی بات چیت کی اور اپنی شادی سے جڑے اہم حقائق اپنے چاہنے والوں سے شیئر کئے۔
کرن جوہر کے پروگرام ”کافی ود کرن 8“ میں سدھارتھ ملہوترا کا اپنی شادی سے متعلق کہنا تھا کہ میرا کیارا ایڈوانی سے شادی کرنے کا بنیادی مقصد یہ تھا کہ وہ ایک اچھے خاندان سے تعلق رکھتی ہے اور کیارا سے شادی کرنے کے بعد مجھے اپنی ذمہ داریوں کا احساس ہوگیا ہے۔
بھارتی میڈیا رپورٹس کے مطابق سدھارتھ ملہوترا کا کہنا تھا کہ شادی کے بعد ہماری محبت میں مزید اضافہ ہوگیا ہے۔
سدھارتھ ملہوترا نے بتایا کہ میں تقریباً 16 سال پہلے بمبئی (ممبئی) آیا تھا اور میں ابتدائی برسوں میں اپنے دوستوں کے ساتھ رہتا تھا۔ اور اب میرے پاس ایک شخص ہے جس سے میں بہت پیار کرتا ہوں۔ جس کا مجھے خیال رکھنا ہے۔
کیارا ایڈوانی کے بارے میں مزید بات کرتے ہوئے، سدھارتھ نے کہا، ”وہ مجھے مزید محنت کرنے کی ترغیب دیتی ہیں۔ جو چیز ہم دونوں کو ایک دوسرے کے ساتھ باندھتی ہے وہ یہ ہے کہ ہم دونوں خاندانی ہیں۔
واضح رہے کہ کیارا ایڈوانی اور سدھارتھ ملہوترا رواں سال 7 فروری کو شادی کے بندھن میں بندھے تھے جس کی ویڈیوز اور تصاویر سوشل میڈیا پر وائرل ہوگئی تھیں۔
