اسلام آباد: چیئرمین پی ٹی آئی کیخلاف توہین الیکشن کمیشن اور توہین چیف الیکشن کمشنر کیسز سماعت کے لیے مقرر ہوگئے۔
اے آر وائی نیوز کے مطابق چیئرمین پی ٹی آئی کے خلاف توہین الیکشن کمیشن کیس کی سماعت 23 نومبر کو ہوگی جس میں فرد جرم کی کارروائی عمل میں لائی جائے گی۔
اسد عمر، فواد چوہدری کے خلاف بھی توہین الیکشن کمیشن کیس کی سماعت 23 نومبر کو ہوگی۔
اسد عمر فواد چوہدری کو ذاتی حیثیت میں طلب کیا گیا ہے جبکہ چیئرمین پی ٹی آئی کو گزشتہ سماعت پر بھی پیش نہیں کیا گیا تھا۔
چیئرمین پی ٹی آئی کو سیکیورٹی خدشات کے باعث اڈیالہ جیل سے الیکشن کمیشن نہیں لایا گیا تھا۔
گزشتہ سماعت پرسیکرٹری داخلہ نے چیئرمین پی ٹی آئی کی عدم پیشی کے حوالے سے رپورٹ جمع کرائی تھی، فواد چوہدری بھی گرفتاری کے باعث گزشتہ سماعت پر پیش نہیں ہوئے تھے۔
اسد عمر نے گزشتہ سماعت میں التوا کی درخواست دائر کی تھی۔
