حکیم شاہ نذیر نے خالص اور جعلی شہد کی پہچان کا آسان سا گھریلو نسخہ بتاتے ہوئے کہا ایک چمچ شہد لے کر ایک گلاس دودھ میں ڈالیں ، اگر دودھ پھٹ جائے تو شہد نقلی ہے۔
آج کل نزلہ، زکام،کھانسی سمیت دیگر وائرل انفیکشن بہت عام ہیں اور بدلتے موسم کےباعث پھیلنے والےامراض سے بچے اور بڑے سب ہی متاثر ہورہےہیں۔
سردیوں میں اس قسم کی وبائی بیماریوں سے بچنے اور جسمانی صحت کو تر وتازہ رکھنے کے لیے خالص شہد کا استعمال انتہائی فائدے مند ہے، شہد ایک بہترین اینٹی آکسیڈنٹ ہے، جس میں پروٹین ، نامیاتی ایسڈز، شکر اور دیگرمرکبات شامل ہیں اور اس کا اسی فیصد حصہ مٹھاس پر مبنی ہوتا ہے۔
صدیوں سے بطور دوا استعمال ہونے والا شہد ایک غذا بھی ہے اور مختلف امراض کے علاج کے ساتھ ساتھ شہد جلد اور بالوں کے لیے بھی بے حد مفید ہے۔
یوں تو شہد ہرعمرکے افراد کےلیے فائدے مند ہے تاہم طبی ماہرین ایک سال سے کم عمر بچوں کےلیے شہد کا استعمال نہ کرنے کا مشورہ دیتے ہیں۔
اے آر وائی نیوز کے پروگرام باخبر سویرا میں حکیم شاہ نزید نے شہد کے استعمال کے حوالے سے مفید مشورے دیئے، انھوں نے سردیوں میں کھانسی سے نجات کے لئے نسخہ بتاتے ہوئے کہا کہ فلفل دراز لے لیں ، فلفل دراز ایک کالی مرچ کی قسم ہوتی ہے اور لمبی ہوتی ہے۔
حکیم شاہ نزید نے بتایا کہ فلفل دراز لے کر اسے باریک پاؤڈر بنالیں اور اس کی ایک چٹکی ایک چمچ شہد میں ملاکر روزانہ ایک بار کھائیں ، اس سے ہر قسم کی کھانسی ختم ہوجائے گی ساتھ ہی بلغم اور ریشہ بھی ختم ہوجائے گا۔
حکیم شاہ نذیر نے خالص اور جعلی شہد میں فرق جاننے کا گھریلو نسخہ بتاتے ہوئے کہا جن لوگوں کو اصلی شہد کی پہچان کرنی ہوں، اس کے لئے ایک چمچ شہد لے کر ایک گلاس دودھ میں ڈالیں ، اگر دودھ پھٹ جائے تو شہد نقلی ہے کیونکہ اگر شہد چینی یا کسی اور چیز سے تیار کیا جاتا ہے تو اس کو صاف کرنے کے لئے پھٹکری ڈالی جاتی ہے اور پھٹکری دودھ پھاڑ دیتی ہے۔
ان کا کہنا تھا کہ اگر آپ کو عام طور پر سانس لینے میں مشکل ہورہی ہے تو ایک چمچ شہد میں ایک گلاس گرم پانی میں ملاکر روزانہ پیئیں، اس سے قوت مدافعت بہتر ہوگی ، سینے کا بلغم صاف کرنے میں بھی مدد ملے گی ساتھ ہی معدے اور جگر سے جڑے امراض کے لئے بھی فائدے مند ہیں۔
حکیم شاہ نذیر نے پٹھوں کے درر سے نجات کے لئے نسخہ بتاتے ہوئے کہا کہ روزانہ ایک چمچ شہد پی لیا کریں، یہ درد دور کرنے میں انتہائی مقید ہے۔
انھوں نے بتایا کہ بہت سے لوگ شہد کا زیادہ استعمال کرتے ہیں ، جو نقصان دہ ہے ، 20 گرام یعنی (ایک ٹیبل اسپون ) سے زیادہ شہد استعمال نہ کریں، اگر 20 گرام سے زیادہ استعمال کریں گے تو یہ جسم میں سستی پیدا کرے گی۔
