اسلام آباد : نگراں وفاقی وزیر آئی ٹی ڈاکٹر عمر سیف نے بڑی خوشخبری سناتے ہوئے کہا فری لانسرز کی سہولت کیلئے پے پال اور اسٹرائیپ سے بات ہورہی ہے اور ورکنگ اسپیس بنا رہے ہیں۔
تفصیلات کے مطابق نگراں وفاقی وزیر آئی ٹی عمر سیف نے تقریب سے خطاب کرتے ہوئے کہا کہ پاکستان میں ہر سال 30 ہزار سے زائد آئی ٹی گریجویٹس پیدا ہوتے ہیں، ان آئی ٹی گریجویٹس کو تربیت فراہم کرنے کی ضرورت ہے۔
ڈاکٹر عمر سیف کا کہنا تھا کہ آئی ٹی گریجویٹس کیلئے 3 سالہ پلان تیار کیا ہے، اسٹارٹ اپس کیلئےپاکستان اسٹارٹ اپس فنڈ کا آغاز کیا جارہا ہے۔
انھوں نے کہا کہ پاکستان میں پوٹینشل کے حوالے سے کوئی دوسری رائے نہیں ہے ، دنیا میں زیادہ مانگ والے آئی ٹی شعبے کےکورسز کی لسٹ فراہم کی ہے۔
نگراں وفاقی وزیر نے بتایا کہ جامعات میں اسٹینڈرائزڈ کوالٹی ٹیسٹ شروع کرنے جارہےہیں، پاکستان اسٹارٹ اپ فنڈ کا آغاز کرنے جارہے ہیں۔
ان کا مزید کہنا تھا کہ نوجوانوں کی فری لانسنگ تربیت کیلئے منصوبہ بندی کی جارہی ہے ، پاکستان میں ترقی کی بےپناہ صلاحیت ہے ،آئی ٹی انڈسٹری ملک میں ترقی کیلئے اہم کردار ادا کررہی ہے، ہر سال 75ہزار آئی ٹی گریجویٹس فارغ التحصیل ہورہے ہیں۔
ڈاکٹر عمر سیف نے کہا کہ پاکستان فری لانسرز کی دنیا کی دوسری بڑی ورک فورس رکھتا ہے، پاکستان کے 15 لاکھ افراد آن لائن پلیٹ فارمز کے ساتھ جڑے ہوئے ہیں، فری لانسرز کی سہولت کیلئے پے پال ،اسٹرائیپ سے بات ہورہی ہے اور سہولت کیلئے کو ورکنگ اسپیس بنا رہے ہیں۔
نگراں وفاقی وزیر کا کہنا تھا کہ پاکستان کی اصل آئی ٹی برآمدات 5 ارب ڈالرز ہیں ، ایس آئی ایف سی نے تمام اسٹیک ہولڈرز کے ساتھ ملکر کام کررہی ہے، ایس آئی ایف سی تعاون سے آئی ٹی انڈسٹری کے مسائل حل ہوئے۔
انھوں نے بتایا کہ پاکستان کا آئی ٹی پوٹینشل سالانہ 15 ارب ڈالر ہے، ہم آئندہ چند سالوں میں 10 ارب ڈالرز کی برآمدات کا ہدف حاصل کرلیں گے۔
