اٹلی نے مصنوعی گوشت کی تیاری پر ہزاروں یورو کا جرمانہ لگا دیا ہے۔
غیر ملکی میڈیا رپورٹس کے مطابق گزشتہ ہفتے اٹلی نے تجربہ گاہوں یعنی لیبارٹری میں تیار کیے جانے والے گوشت پر پابندی لگا دی ہے، خلاف وزری پر 60 ہزار یورو (تقریباً 55 لاکھ روپے) جرمانہ لگایا جا سکتا ہے۔
یورپ میں ایسا پہلی مرتبہ ہوا ہے جب لیبارٹری میں تیار مصنوعی گوشت پر پابندی لگائی گئی ہے، اس کے لیے اٹلی کی پارلیمنٹ میں ووٹنگ کی گئی۔
159 اراکین پارلیمنٹ مصنوعی گوشت کی تیاری پر پابندی کی حمایت کی، جب کہ 53 اراکین نے اس کے خلاف ووٹ دیا۔ دل چسپ بات یہ ہے کہ اس وقت دنیا کے صرف دو ملک امریکا اور سنگاپور میں لوگوں کو لیبارٹری میں تیار شدہ گوشت کھانے کی اجازت ہے۔
میڈیا رپورٹس میں کہا گیا ہے کہ اس پابندی سے متعلق اٹلی کا کہنا ہے کہ ملک میں کھانے کی ثقافت کو خطرہ تھا اس لیے یہ قدم اٹھانا پڑا۔ واضح رہے کہ اٹلی وہ یورپی ملک ہے جس کا مغربی ثقافت اور کھانوں پر بہت گہرا اثر ہے۔
اٹلی میں کسانوں کی لابی بھی بہت مضبوط ہے اور وہ طویل مدت سے مصنوعی گوشت پر پابندی لگانے کا مطالبہ کر رہے تھے، اس لیے پابندی کے فیصلے پر انھوں نے خوشی کا اظہار کیا ہے تاہم دوسری طرف ایسی تنظیموں کو شدید صدمہ ہوا ہے مویشیوں کی بہبود کے لیے آواز اٹھاتی ہیں۔
