افریقی ریجن کوالیفائر ایونٹ میں تاریخ رقم کرتے ہوئے نوآموز یوگنڈا کی ٹیم نے انٹرنیشنل ٹی ٹوئنٹی ٹیم زمبابوے کو شکست سے دوچارکردیا۔
زمبابوے کی ٹیم نے پہلے کھیلتے ہوئے مقررہ اوورز میں 7 وکٹوں کے نقصان پر 136 رنز بنائے۔ کپتان سکندر رضا نے 39 گیندوں پر 48 رنز اسکور کیے۔
ہدف کے تعاقب میں یوگنڈا کی ٹیم نے شاندار کارکردگی کا مظاہرہ کیا اور ایک اوور قبل ہی 5 وکٹوں کے نقصان پر 137 رنز بنا کر جیت اپنے نام کی۔
یوگنڈا کو ایک مرحلے پر 56 بالز پر 76 رنز درکار تھے مگر رضاعت علی شاہ نے 28 بالز پر 42 رنز کی اننگز کھیل کر اپنی ٹیم کے لیے کامیابی کی راہ ہموار کی۔
اس وقت زمبابوے کی ٹیم پوائنٹس ٹیبل پر چوتھے نمبر پر موجود ہے جبکہ اسے مزید تین میچز کھیلنا ہیں۔ نمیبیا اور کینیا کی ٹیمیں اپنے تینوں میچز جیت کر پہلے اور دوسرے نمبر پر موجود ہیں۔
افریقن ریجن کوالیفائر ایونٹ میں حصہ لینے والی سات ٹیموں میں سے یوگنڈا اس وقت تیسرے نمبر پر ہے جس نے تنزانیہ کو شکست دی تھی اور اب زمبابوے کو بھی دھول چٹائی ہے۔ زمبابوے کے بقیہ میچز روانڈا، نائیجیریا اور کینیا سے ہونے ہیں۔
یوگنڈا کو نمیبیا کے ہاتھوں شکست کا سامنا کرنا پڑا تھا۔ یوگنڈا کا کسی فل ممبر انٹرنیشنل ٹی ٹوئنٹی کے خلاف پہلا میچ تھا جسے انھوں نے اپنی پرفارمنس سے یادگار بنا لیا۔
واضح رہے کہ افریقہ ریجن کوالیفائر میں سرفہرست دو ٹیمیں ٹی ٹوئنٹی ورلڈ کپ کے لیے کوالیفائی کریں گی، جس کی میزبانی ویسٹ انڈیز اور امریکا جون 2024 میں کریں گے۔
