اسلام آباد : ایف آئی اے نے کوہستان میں لڑکی کے قتل کے واقعے میں سوشل میڈیا پر وائرل تصاویر کی تحقیقات شروع کردی ہیں، پولیس نے تصاویروائرل ہونے کے بعد ایف آئی اے سے مدد کی درخواست کی تھی۔
تفصیلات کے مطابق کوہستان میں لڑکے کے ساتھ تصاویر وائرل ہونے پر لڑکی کو قتل کرنے کے واقعے پر ایف آئی اے نے سوشل میڈیا پر وائرل تصاویر کی تحقیقات شروع کر دی ہے۔
پولیس کا کہنا ہے کہ ایف آئی اےجعلی سوشل میڈیااکاؤنٹس کے ذمہ داران کو گرفتار کرے گی ، تصاویر وائرل ہونے کے بعد ایف آئی اے سے مدد کی درخواست کی تھی تاہم قتل میں ملوث ملزمان کی گرفتاری کیلئے بھی چھاپے مارے جا رہے ہیں۔
یاد رہے خیبرپختونخوا کے ضلع کولئی پالس میں چند دن پہلے دو لڑکیوں کے ساتھ دو لڑکوں کی تصاویر سوشل میڈیا پر وائرل ہوئیں تھیں، جس کے بعد ایک لڑکی کو گھر والوں نے فائرنگ کرکے قتل کر ڈالا تھا جبکہ دوسری لڑکی کو پولیس نے بچالیا تھا۔
پولیس نے مقتولہ کے والد کو گرفتار کرکے مقدمہ درج کرلیا ہے اور دیگر ملزمان کی تلاش جاری ہے۔
پولیس کا کہنا ہے لڑکی نے عدالت میں کہا کہ اسے گھر والوں سے کوئی خطرہ نہیں، لڑکی کے بیان پر عدالت نے گھر بھیج دیا، جس کی گزشتہ روز شادی کردی گئی ہے۔
پولیس کے مطابق متعلقہ تصاویر ایڈٹ کرکے جوڑی گئی تھیں، ایڈٹ شدہ تصویروں میں موجود دونوں لڑکے روپوش ہیں۔
