پشاور : پولیس نے غیر ملکی سیاح کی خودکشی سے متعلق ابتدائی رپورٹ تیار کرلی ، جس میں بتایا گیا کہ پولیس متعلقہ فلیٹ پہنچی تو کمرے پر لکھا تھا پولیس کو بلالیں اور کمرے کی چابی کچن میں ہے۔
تفصیلات کے مطابق پشاور میں تھانہ ناصر باغ کی حدود میں اطالوی سیاح کی خودکشی سے متعلق پولیس کی ابتدائی رپورٹ تیار کرلی گئی۔
رپورٹ میں بتایا گیا ہے کہ 4 دسمبر کو اطالوی شہری کی خودکشی سے متعلق اطلاع ملی، پولیس متعلقہ فلیٹ پہنچی، جہاں ایک ایک کمرہ لاک پایا گیا، کمرے پر لکھا تھا پولیس کو بلالیں اور کمرے کی چابی کچن میں ہے۔
ابتدائی رپورٹ میں کہا گیا کہ کچن سے کمرے کی چابی اور ملکی و غیرملکی کرنسی بھی برآمد ہوئی، موقع پر موجود عثمان خان اور علی محمودنے بتایا متوفی کا تعلق اٹلی سے ہے۔
عثمان خان نے متوفی کو کرایہ پر فلیٹ دیا تھا ، عثمان خان نے پولیس کو بتایا کے متوفی سیاح ویزے پر آیا تھا اور گزشتہ کئی دنوں سے متوفی سےرابطہ نہیں ہوا تھا۔
یاد رہے پشاور کے علاقے مراد آباد میں غیرملکی سیاح نے مبینہ طور پر خودکشی کرلی تھی ، غیرملکی سیاح کی شناخت مسٹر جوشوا موائسز ورگاس کے نام سے ہوئی تھی، اطالوی شہری کو 9 اکتوبر کو سیاحتی ویزا جاری ہوا تھا۔
پولیس کا کہنا تھا کہ اطالوی شہری عارضی طور پر نجی سوسائٹی کے فلیٹ میں مقیم تھا۔
