لاہور: مسلم لیگ ن کی رہنما مریم اورنگزیب نے کہا ہے کہ دوسروں کو دہشت گرد کہنے والا خود 9 مئی کا مجرم ہے۔
مسلم لیگ ن کی رہنما مریم اورنگزیب نے لاہور میں انسدادِ دہشت گردی کی عدالت کے باہر میڈیا سے گفتگو کرتے ہوئےکہا کہ ہم پر یہ دہشت گردی کے مقدمے بناتے رہے اور خود 9 مئی کو ریاست کے خلاف دہشت گردی کی گئی، دوسروں پر دہشت گردی کے مقدمے بنانے والا خود 9 مئی کا مجرم ہے۔
مریم اورنگزیب نے کہا کہ شہدا کے مجسمے سڑکوں پر پھینکے گئے، اسپتال اسکول مساجد جلائی گئیں، پاکستان کے دوستوں کو ناراض کیا گیا اور خود ڈاکے ڈالتے رہے، کہتے ہیں 190 ملین پاکستان تو آگیا، ڈرامہ نہ کریں یہ رقم تو قومی خزانے میں آنی تھی۔
ن لیگی رہنما نے کہا کہ ناجائز طریقے سے آؤٹ آف کورٹ سیٹلمنٹ کر کے پیسہ بانی پی ٹی آئی کی جیب میں گیا، سائفر جیسے حساس معاملے پر سیاست کروں گے اور حساب نہیں مانگا جائے گا ایسے کیسے ہوگا؟، لندن پلان تو تب بنا تھا جب 3 دفعہ کے وزیراعظم کو گھر بھیجنے کا منصوبہ بنایا گیا۔
مریم اورنگزیب نے کہا کہ 190 ملین پاؤنڈ قومی خزانے میں آنے تھے سپریم کورٹ کے اکاؤنٹ میں نہیں، غیر قانونی سیٹلمنٹ سے القادر ٹرسٹ کی زمین خریدی گئی، بانی پی ٹی آئی ریاستی دہشت گردی کے احکامات جاری کررہا تھا، ریاستی دہشت گردی اور 60 ارب کی کرپشن کا جواب دیا جائے۔
انہوں نے کہا کہ 8 فروری کو عوام ووٹ دے کر نوازشریف کو چوتھی بار وزیراعظم بنائیں گے، ملک ترقی کرے گا، سی پیک بحال ہوگا، نوجوانوں کو روزگار ملے گا۔
