امریکی سینیٹر رک اسکاٹ نے چین سے درآمد ہونے والے ”لہسن“ کو امریکا کی قومی سلامتی کے لئے سنگین خطرہ قرار دے دیا ہے، جبکہ اس حوالے سے تحقیقات کا بھی مطالبہ کیا ہے۔
بین الاقوامی خبر رساں ادارے کی رپورٹ کے مطابق ریپبلکن سینیٹر رک اسکاٹ نے امریکی وزیر تجارت کو خط لکھ کر ”چینی لہسن“ کے غیر محفوظ ہونے سے متعلق تحفظات کا اظہار کرتے ہوئے معاملے کی تحقیقات کا بھی مطالبہ کیا۔
امریکی سینیٹر رک اسکاٹ کا اپنے خط میں ”چینی لہسن“ اگانے کے طریقوں پر سوال اٹھاتے ہوئے کہنا تھا کہ چین دنیا بھر میں لہسن کا سب سے بڑا ایکسپورٹر ہے اور امریکا اس کا سب سے بڑا خریدار ہے۔
اُن کا کہنا تھا کہ یہ بات امریکا میں صحت عامہ کے مسائل پیدا کرسکتی ہے، بیرون ممالک خصوصاً کمیونسٹ چین میں لہسن اگانے کے طریقے غیر محفوظ ہیں۔
امریکی سینیٹر رک اسکاٹ نے مزید لکھا کہ فوڈ سیفٹی اور سکیورٹی ایک اہم مسئلہ ہے اس لیے یہ معاملہ ہماری قومی سلامتی، پبلک ہیلتھ اور معاشی خوشحالی کیلئے خطرہ ہے۔
کینیڈا جانے کے خواہش مندوں کے لئے اہم خبر!
امریکی وزارت تجارت سے مطالبہ کرتے ہوئے اُن کا کہنا تھا کہ چین سے درآمد ہونے والی لہسن کے معیار اور اس کے امریکیوں کی صحت پر مرتب ہونے والے منفی اثرات سے متعلق تحقیقات ہونی چاہئیں۔
