دو ماہ سے مظلوم فلسطینیوں پر ظلم کے پہاڑ ڈھانے والی اسرائیلی فوج کے ٹرک کو ڈاکوؤں نے لوٹ لیا اور ہزاروں گولیاں لوٹ کر فرار ہوگئے۔
غاصب صہیونی ریاست جو گزشتہ دو ماہ سے مظلوم فلسطینیوں پر تاریخ انسانی کے بدترین مظالم ڈھا رہی ہے جس کے نتیجے میں اب تک 17 ہزار سے زائد فلسطینی شہید اور 50 ہزار کے لگ بھگ زخمی ہوچکے ہیں اس کا فوجی ٹرک ڈاکوؤں کے ہتھے چڑھ گیا۔
غیر ملکی میڈیا کے مطابق اسرائیلی فوج نامعلوم افراد کی جانب سے کی جانے والی ایک تیز اور اسمارٹ ڈکیتی کا شکار ہوئی جس میں امریکی ساختہ ایم سولہ رائفل کی بیس ہزار سے زیادہ گولیاں چوری کرلی گئیں جن کی مجموعی مالیت 60 ہزار ڈالر بتائی جاتی ہے۔
رپورٹ کے مطابق یہ سامان ڈبوں میں پیک کرکے ایک ٹرک پر لادا گیا تھا جسے صحرائے نقب میں واقع “تسلیم” فوجی اڈے پر لے جایا گیا تھا تاہم ٹرک اڈے سے چار کلو میٹر دور ایک ٹریفک سگنل پر رکا جہاں ڈاکوؤں نے اس پر دھاوا بول دیا اور لوٹ مار کرنے کے بعد با آسانی فرار ہونے میں کامیاب ہو گئے۔
جنوبی اسرائیل میں فوج کے کمانڈر امیر کوہن نے اس واقعے کی تحقیقیات کے لیے ایک انکوائری کمیشن بنانے کا حکم دیا ہے جو دوسرے سکیورٹی اداروں کے ساتھ مل کر ڈکیتی کی کارروائی کا پتا چلائے گا۔
واضح رہے کہ اسرائیلی فوج اسے زمینی افواج کی تربیت کا سب سے بڑا اڈہ قرار دیتی ہے۔ مذکورہ علاقے میں فوجی نقل وحمل کی نگرانی کے لیے جدید انفرا اسٹرکچر کے ساتھ جا بجا سی سی ٹی وی کیمرے لگے ہوئے ہیں اس کے باوجود ڈاکوؤں کا یہاں با آسانی چھپ جانا اور کامیاب واردات کرنا ناقص انتظامات کی قلعی کھول رہا ہے۔
