توشہ خانہ کیس میں سربراہ پی ٹی آئی کی درخواست ضمانت قبل از گرفتاری خارج کر دی گئی۔
تفصیلات کے مطابق احتساب عدالت کےجج محمد بشیر نے درخواست پر محفوظ فیصلہ سنا دیا۔
ڈپٹی پراسیکیوٹر جنرل نیب مظفرعباسی کا کہنا ہے کہ سربراہ پی ٹی آئی کی درخواست ضمانت مسترد کردی گئی جس کے بعد اب وارنٹ گرفتاری کی تعمیل کرائیں گے اور کل ریمانڈکی استدعا کریں گے۔
اس سے قبل 6 دسمبر 2023 کو اسلام آباد ہائیکورٹ کے چیف جسٹس عامر فاروق نے ساڑھے دس ماہ سے زیر سماعت چیئرمین پی ٹی آئی کی درخواست پر مختصر فیصلہ سنادیا اور کہا تفصیلی فیصلہ بعد میں جاری کیا جائے گا۔
فیصلے میں عدالت نے توشہ خانہ کیس میں سربراہ پی ٹی آئی کی الیکشن کمیشن کے 21اکتوبر 2022 کے فیصلے کیخلاف درخواست واپس لینے کی استدعا مسترد کردی۔
عدالت نے کہا کہ الیکشن کمیشن کےفیصلےکیخلاف اپیل اسلام آباد ہائیکورٹ ہی سنےگی۔
چیئرمین پی ٹی آئی کی طرف سے وکیل بیرسٹر علی ظفر نے جنوری 2023 درخواست دائر کرتے ہوئے موقف اختیار کیا تھا کہ توشہ خانہ کیس میں الیکشن کمیشن کے فیصلے کیخلاف ایک درخواست لاہور ہائیکورٹ میں بھی زیر سماعت ہے ، لاہور ہائیکورٹ نے اس درخواست پر سماعت کیلئے پانچ رکنی بنچ تشکیل دے رکھا ہے اس لئے ہم اسلام آباد ہائیکورٹ سے اپنی درخواست واپس لیکر لاہور ہائیکورٹ میں اس کیس کی پیروی کرنا چاہتے ہیں۔
چیئرمین پی ٹی آئی کے وکیل کی استدعا پر عدالت نے الیکشن کمیشن نوٹس جاری کیا، دوران سماعت ایڈووکیٹ امجد پرویز نے الیکشن کمیشن کی نمائندگی کرتے ہوئے موقف اپنایا کہ الیکشن کمیشن کے فیصلے کیخلاف پہلے اسلام آباد ہائیکورٹ میں درخواست دائر ہوئی اس لئے لاہور ہائیکورٹ کے بجائے اسلام آباد ہائیکورٹ میں ہی سماعت ہونی چاہئیے۔
ستمبر2023 تک یہ معاملہ التوا میں رہا، جس پر چیئرمین پی ٹی آئی کے وکیل کی جانب سے ایک نئی درخواست دائر کی گئی، نئی درخواست پر سماعت کے دوران چیف جسٹس عامر فاروق نے ریمارکس دئیے کہ ہم آپ کی پہلے سے زیر التوا درخواست کو جلد سماعت کیلئے مقرر کردیتے ہیں۔
عدالت نے 13ستمبر کو فریقین کے دلائل سننے کے بعد اس درخواست پر فیصلہ محفوظ کیا تھا۔
