اسلام آباد: الیکشن کمیشن آف پاکستان نے عام انتخابات کیلیے مقامی اور بین الاقوامی آبزرورز (مبصرین) سے متعلق قواعد جاری کر دیے۔
الیکشنز ایکٹ 2017 کے سیکشن 238 کے مطابق کمیشن اپنی تحریک پر یا اس سلسلے میں دی گئی درخواست پر کسی بھی ملکی یا بین الا قوامی انتخابی آبزرور ادارے کو اجازت نامہ جاری کرے گا۔
اجازت نامے کے حامل نمائندے انتخابات کے انعقاد، پولنگ اسٹیشن تک رسائی، ووٹوں کی گنتی اور نتائج کو اکٹھا کرنے کے عمل کا مشاہدہ کرنے کی اجازت ہوگی۔
کسی بھی شخص کو الیکشن کے عمل کا مشاہدہ کرنے کی اجازت نہیں ہوگی اگر وہ کمیشن یا اس کے مجاز افسر کی جانب سے تسلیم شدہ (accredited) آبزرور نہیں ہے۔
کسی بھی سیاسی جماعت سے وابستہ افراد کو اجازت نامہ جاری نہیں کیا جائے گا اگر وہ کسی انتخابی حلقے میں شامل لوگوں کے امن و سکون کیلیے نقصان دہ سرگرمیوں میں ملوث رہا ہے، اپنی تنظیم جس کا وہ رکن ہے، کا مختار نامہ (اجازت نامہ) فراہم کرنے میں ناکام رہتا ہے۔
حکومت سے سکیورٹی کلیئرنس حاصل نہ کی ہو، انتخابی عمل کے مشاہدہ کے دوران ہر آبزرور، کمیشن یا مجاز افسر کے جاری کردہ اپنے شناختی کارڈ کو نمایاں طور پر ظاہر کرے گا۔
ہر آبزرور یا تنظیم انتخابات کے انعقاد کے مشاہدے کے دوران نظر آنے والی انتخابی بے ضابطگیوں کو سفارشات کے ساتھ رپورٹ کی صورت میں کمیشن کو پیش کر سکتی ہے۔
آبزرورز کیلیے ای سی پی کی اوپن ڈور پالیسی اپنائی ہے جو کمیشن کے پہلے سے جاری کردہ ضابطہ اخلاق پر عمل درآمد سے مشروط ہے۔
آئندہ عام انتخابات کے دوران آبزرورز کی ایک بڑی تعداد کے شریک ہونے کی توقع ہے۔ الیکشن کمیشن انتخابی عمل کا مشاہدہ کرنے اور پولنگ اسٹیشنوں اور متعلقہ الیکشن حکام کے دفاتر تک رسائی میں آسانی کیلیے آبزرورز کو ایکریڈیٹیشن کارڈ جاری کرے گا۔
